Натпреварот од осминафиналето на Купот на Шпанија, градското дерби меѓу Бетис и Севилја беше прекинато во 40. минута со резултат 1-1 бидејќи еден од навивачите на Бетис фрли со шипка на теренот и го удри во глава играчот на Севилја, Хоан Џордан.
Набил Фекир со удар директно од корнер израмни на 1-1, а додека го прославуваше тој гол со соиграчите, неодговорен навивач фрли стап од трибините зад голот и најверојатно несакајќи го удри Џордан.
Судијата Рикардо де Бургос Бенгоечеа веднаш го прекина натпреварот, играчите на Севилја, меѓу кои и поранешниот хрватски репрезентативец Иван Ракитиќ, веднаш се повлекоа во соблекувалната, додека домашните се обидуваа да го убедат судијата да го продолжи натпреварот, но безуспешно.
Инаку, Севилја во 35. минута ја доведе во водство Алехандро Гомез.
Мајорка се пласираше во четвртфиналето со победа (2-1) против Еспањол, Рајо Ваљекано со 1-2 славеше на гости кај Џирона.
