Италијанскиот калчолигаш Интер објави соопштение во кое наведува дека соработува со финансиската полиција, но посочува дека ниту еден работник не е под истрага.
Финансиската полиција влезе во канцелариите на миланскиот клуб барајќи докази во врска со истрагата за одредени трансфери и за наводна проневера на пари.
„Можеме да потврдиме дека клубот ги достави бараните документи кои се однесуваат на продажба на одредени играчи во сезоните 2017/18 и 2018/19.
Барањето е поднесено од Јавното обвинителство на Милано, со цел да се провери дали капиталната добивка е уредно евидентирана. Финансиските извештаи на клубот се изготвени во согласност со најригорозните сметководствени принципи.
Ниту еден вработен во Интер не е под истрага. Не се покренати обвиненија. Според соопштението на јавното обвинителство, се работи за предистражна постапка“, се наведува во соопштението на Интер.
Ова е продолжение на истрагата во Италија, а претходно финансиската полиција ја „проверуваше“ документацијата на Јувентус.
