Менаџерот на Манчестер Јунајтед, Оле Гунар Солскјер, истакна дека тимот е целосно фокусиран на мечот со Аталанта и посакува триумф на утрешниот меч. „Црвените ѓаволи“ од 21 часот во Бергамо го играат натпреварот од четвртото коло од Лигата на шампионите. Потоа ги очекува градското дерби со Манчестер Сити во Премиер – лигата.
„Целиот фокус е на овој натпревар. А потоа ќе се посветиме на она што доаѓа – дербито на Манчестер. Знаеме дека ќе биде тешко, но подготвени сме. Ние сме во добра позиција во групата откако остваривме победи на домашен терен, но треба да дојдеме до посакуваниот резултат на гости“, изјави Оле Гунар Солскјер.
Норвежанецот беше цел на сериозни критики во последните неколку седмици, но, сепак, се уште е на клупата на Манчестер Јунајтед.
„Отсекогаш сум уживал во критиките. Тие ме прават посилен. Сите ние имаме различни работни места, нивна работа е да го дадат своето мислење. Не сакам да се карам со никого. Но, дефинитивно ги разбирам сите и сакам да се подобрам“, дополни менаџерот на Манчестер Јунајтед.
