Фудбалерот од средниот ред на Интер и репрезентацијата на Чиле, Артуро Видал, направи бура на социјалните мрежи, откако се појави видео снимка на која се гледа дека бил толку пијан, што не можел да влезе во неговиот автомобил.
„Газета дело Спорт“ истакнува дека видеото е снимено на 18 август, три дена пред натпреварот на Интер во Серија А против Џенова. Не е јасно зошто клипот стана вирален сега, речиси два месеци подоцна.
Видеото го снимила жена која стои на балкон и јасно се гледа дека Видал претерал со алкохолот, па не може ниту да влезе во црвениот спортски автомобил.
„Тој дури и не може да стане“, вели жената која го снимила видеото.
„Газета дело Спорт“ пренесува дека во Интер се свесни за овој инцидент и веќе разговарале за тоа со играчот во август.
