Брегалница и Тиквеш на прволигашки двобој, Работнички гостува во Ѓорче Петров

Брегалница против Тиквеш, но сега на прволигашка сцена. Ривалството на Истокот и понатаму трае, а штипјани се надеваат дека ќе успеат да стигнат до победа против тимот што многу полошо го стартуваше шампионатот. Но, сега Влатко Костов ја презеде командата, иако нема денеска од клупата да го води составоот од Кавадарци.

Левиот бек на Брегалница, Михаил Маневски, вели дека бодовите ќе останат во Штип.

„Желбата секако е победа како би имале приклучок кон горниот дел од табелата. Свесни сме дека ќе биде повторно еден цврст, тежок, дуел какви се сите оваа сезона во Првата лига, но знаеме и дека можеме и треба да ги освоиме трите бода. Тиквеш ќе допатува во Штип силно мотивиран за бодови, па затоа мора максимално сериозно да пристапиме на натпреварот. Ако ги исполниме сите зададени задачи од стручниот штаб, онака како што треба на терен, знам дека позитивниот резултат нема да изостане“, вели Маневски.

Градска пресметка меѓу Македонија ЃП и Работнички. Стадионот во Ѓорче Петров важи за тешко гостување. Но, како што истакнува крилниот напаѓач Дејан Тантуровски, Работнички сака да го задржи добриот ритам од последните натпревари.

„Влеговме во добар ритам, екипата полека влезе во посакуваниот курс и забележавме две победи во низа. Ќе се обидеме да продолжиме во ист ритам и на денешното гостување во Ѓорче Петров. Знаеме дека е тоа терен каде тешко се освојуваат бодови, Македонија ЃП е екипа што заслужува респект и посебно квалитетно игра пред домашната публика, но ние сме подготвени за надигрување и одиме со цел да оствариме позитивен резултат“, вели Дејан Тантуровски.

Актуелниот шампион Шкендија гостува кај Скопје, а Шкупи по една година се враќа дома на Чаир. Пелистер го пречекува актуелниот лидер Академија Пандев, а Ренова е домаќин на Струга Трим Лум.

ДВОЈКИ ПРВА ЛИГА, 7.КОЛО (15 ЧАСОТ)

Чаир: ШКУПИ – БОРЕЦ

Штип: БРЕГАЛНИЦА – ТИКВЕШ

Ѓорче Петров: МАКЕДОНИЈА ЃП – РАБОТНИЧКИ

Тетово: РЕНОВА – СТРУГА ТРИМ ЛУМ

Битола: ПЕЛИСТЕР – АКАДЕМИЈА ПАНДЕВ

Автокоманда: СКОПЈЕ – ШКЕНДИЈА