Македонскиот прволигаш Работнички изрази благодарност до денешниот спортски ривал Ренова за помошта што ја доби денеска, по дефектот на клупскиот автобус на патувањето кон Тетово. „Романтичарите“ го истакнуваат спортското џентлеменство на Ренова која испрати автобус како пријателска реакција, а со цел фудбалерите и стручниот штаб на Работнички побрзо да стигнат на Градскиот стадион во Тетово.
„Фудбалскиот клуб Работнички изразува благодарност до ФК Ренова за одличниот прием во текот на натпреварот, но тоа што сакаме да го потенцираме е пријателскиот гест на клубот од Тетово пред почетокот на денешниот меч. Ренова покажа големина и спортско џентлеменство во моментите кога тоа му беше потребно на Работнички.
ФК Ренова испрати автобус како пријателска реакција на проблемите кои настанаа при нашето патување кон Тетово. Со тоа помогна да нема преголемо доцнење на стартот на натпреварот, а фудбалерите и стручниот штаб на Работнички безбедно стигнаа на ова гостување.
Ова е вистински пример на меѓусебно клупско почитување и израз на спортски фер-плеј и надвор од теренот“, се вели во соопштението на ФК Работнички.
