Пелистер ја сопре Шкендија, Брегалница со луд триумф против Академија Пандев (ФОТО)

Актуелниот првак Шкендија ремизираше (2-2) на гости против Пелистер во Битола. Тоа е прв бод за битолчани во шампионатот, а нова сопка за тимот на Бруно Акраповиќ. Флорент Рамадани во деветтата минута донесе предност за Шкендија, но Виктор Нилдо Јуфо израмни од слободен удар до полувремето, а во 63.минта од пенал се погрижи за целосен пресврт. Аденис Шала израмни во 79.минута, а во судиското продолжение Шкендија можеше и до победа, но среќата и гредата беа на страната на Пелистер.

Брегалница не ремизираше по петти пат, туку го зема скалпот на лидерот Академија Пандев со 3-2. Струмичани двапати водеа, но на крајот си одат со наведнати глави од Штип. Кристијан Велиновски во 17.минута постигна убав гол за водство на гостите, а израмни Никола Ескиќ во 66.минута. Мартин Мирчевски седум минути подоцна донесе нова предност за Акадмеија Пандев, но Милан Џокиќ повторно израмни во 83.минута. Во судиското продолжение, Марјан Алтипармаковски донесе победа за Брегалница.

Шкупи го декласира Скопје со 4-1 на стадионот „Борис Трајковски“ во Маџари. Марјан Радевски го отвори резултатот во 28.минута, а на самиот почеток на вториот дел мечот беше решен. Валид Хамиди зголеми на 2-0 во 46.минута, а Сандеј Адетуњи во 49.минута постигна трет гол. До крајот тој уште еднаш се запиша меѓу стрелците. Скопје постигна почесен погодок во судиското продолжение од мечот.

Македонија ЃП со 3-2 го победи Борец во Ѓорче Петров. Ермедин Адем постигна хет – трик за ѓорѓепетровци, два гола од пенал, а Лука Трајковски беше двоен стрелец за Борец. На крајот, бодовите останаа за „лавовите“.

Тиквеш и Струга ТЛ ремизираа 1-1. Симеон Христов во десеттата минута обезбеди предност за домаќинот од Кавадарци, но Емир Скендери донесе бод за стружани со голот во 80.минута од дуелот.

Натпреварот во Тетово меѓу Ренова и Работнички започна со половина час задоцнување и во моментот резултатот е 1-1. Ремзифаик Селмани донесе предност за Ренова во 25.минута, а израмни Марио Станковски од пенал во 36.минута.

ПРВА ЛИГА, 5.КОЛО – РЕЗУЛТАТИ

ПЕЛИСТЕР – ШКЕНДИЈА 2-2

ШКУПИ – СКОПЈЕ 4-1

БРЕГАЛНИЦА – АКАДЕМИЈА ПАНДЕВ 3-2

МАКЕДОНИЈА ЃП – БОРЕЦ 3-2

ТИКВЕШ – СТРУГА ТРИМ ЛУМ 1-1

ВО ТЕК: РЕНОВА – РАБОТНИЧКИ 1-1