По 16 сезони, Серхио Рамос се разделува со Реал Мадрид. Клубот објави дека утре ќе биде организирана проштална церемонија за дефанзивецот кој повеќе од деценија и половина беше еден од синонимите за „кралскиот клуб“.
Рамос кој во 2005 година за сума од 27 милиони евра од Севиља пристигна на „Сантијаго Бернабеу“ освои дури 22 трофеи со Реал Мадрид.
Шестпати триумфираше во Ла Лига, четири пати во Лигата на шампионите, двапати триумфира во Кралскиот Куп, петпати во шпанскиот Суперкуп, три пати во УЕФА Суперкупот. Рамос во „кралскиот“ дрес одигра 469 натпревари и постигна 72 гола, што е импресивна бројка за дефанзивец.
Рамос си заминува од Реал Мадрид бидејќи не можеше да најде заеднички јазик со Перез за новиот договор, а најголем интерес за дефанзивецот пројавуваат ПСЖ, Манчестер сити и Манчестер јунајтед.
