Капинковски: Дербито не признава фаворити, но мислам дека многу работи зависат од Пелистер

Вардар гостува во Битола, а тоа секогаш е мотив домашниот тим да чувствува пеперутки и да посакува триумф. Овојпат Пелистер е фаворит, со оглед на актуелната ситуација во најтрофејниот клуб. Вардарци се десеткувани, без шефот на стручниот штаб Никола Илиевски Џиџи, кој се опоравува од коронавирусот, а во клубот веќе подолг период владее хаос на организациски план.

Но, тоа не ги засега фудбалерите и стручниот штаб на Пелистер. Димитар Капинковски си ја гледа својата работа и посакува триумф за продолжување на добрите игри и резултати во пролетниот дел од првенството.

„Ова е дерби кое секогаш е интересно. Нема фаворити, без разлика каква е формата на екипите, бодовната ситуација. Видовме дека претходниот натпревар заврши 2-2, со доста голови и фудбал. Се надевам на таков натпревар и во Битола. Секој си има свои математики, а ние како и на секој дуел играме до максимум и да ги освоиме бодовите.

Вардар има промени во играчкиот кадар и стручниот штаб. Сигурно дека имаат свои планови, а тимот секако поседува потенцијал и квалитет. Но, мислам дека работите ќе зависат и од нас. Ако одиграме како што знаеме, верувам дека ќе ги освоиме потребните бодови“, изјави Капинковски.

Вардарци имаат промена само во дресовите. За првпат ќе носат „комитски“ дрес овој викенд, како порака дека тимот сака да се дистанцира од спонзорот Сергеј Самсоненко кој има огромни долгови кон клубот.

Пелистер се наоѓа на осмото место на табелата со 29 бода, а Вардар е деветти со два бода помалку. Ова дерби е пресметка и за бегство од опасната зона на табелата.