Италијанскиот калчолигаш Милан ја губи полека битката за шампионската титула во Серија А, но, сепак, приоритет за „росонерите“ оваа сезона е да изборат пласман во Лигата на шампионите следната година. А потоа на „Сан Сиро“ треба да стигне квалитетно засилување за средниот ред.
Како што откриваат италијанските медиуми, Паоло Малдини успеал да го договори ангажманот на хрватскиот интернационалец Никола Влашиќ. Тој е еден од најдобрите фудбалери во руското првенство, член на ЦСКА Москва и Малдини смета дека ќе експлодира во дресот на Милан.
Никола Влашиќ во 2017 година за 10 милиони евра од Хајдук Сплит се пресели во Евертон, а две години за 15 милиони евра беше откупен од ЦСКА Москва. Оваа сезона има 11 гола на 27 натпревари и Милан е подготвен да плати 30 милиони евра за да го доведе во летниот преоден рок.
