Магија на Ибракадабра и Интер е на колена. Златан Ибрахимовиќ со два гола го реши „Дерби дела мадонина“ и донесе триумф (1-2) за Милан во големото градско дерби. „Нероаѕурите“ важеа за домаќини на овој меч, но одиграа очајно, а тоа Милан знаеше да го искористи.
Во 12.минута беше досуден пенал, Хандановиќ го одбрани ударот на Златан Ибрахимовиќ, но одбиената топка Швеѓанецот ја внесе во голот. Само четири минути подоцна уште еднаш се запиша во листата на стрелците.
До крајот на првиот дел, Ромелу Лукаку намали на 1-2, но тоа беше се од Интер на ова дерби. Во завршницата Лукаку имаше уште две шанси за израмнување, но не успеа.
