По минималната победа над Аргеш Питешти (1-0) и високиот пораз од Копер (0-4), македонскиот шампион Шкендија го затвори својот престој во Словенија со нерешен резултат – 1:1 против бугарскиот гигант ЦСКА Софија, во третиот и последен контролен натпревар.
Дуелот започна со рамноправна игра на двете страни, а првата сериозна шанса ја имаше Шкендија уште во седмата минута, најавувајќи борбен натпревар. До крајот на полувремето и двете екипи создадоа неколку опасни ситуации, но мрежите мируваа.
Во вториот дел, ЦСКА го засили темпото и по околу еден час игра ја искористи една грешка во одбраната на тетовскиот тим. Иванов се најде на вистинското место и без проблем ја смести топката во празната мрежа, носејќи водство за Бугарите од 1-0.
Шкендија не се предаде. Тимот од Тетово го засили притисокот, а наградата стигна во 86. минута кога Красниќи со вистински еврогол од далечина ја погоди левата страна од голот за израмнување и поставување на конечните 1-1.
