Барселона официјално го претстави голманот на Еспањол, Жоан Гарсија, како прво летно засилување. 24-годишниот чувар на мрежата потпиша договор на шест години, откако каталонскиот гигант ја активираше откупната клаузула од 25 милиони евра.
Гарсија, кој е дете на Еспањол, имаше одлична сезона во Ла Лига, што го убеди шампионот да го доведе како прв голман за новата сезона. Во текот на четири сезони со првиот тим, тој одигра 67 натпревари, прими 72 гола и 21 пат ја зачува својата мрежа.
Иако сè уште нема настап за сениорската репрезентација на Шпанија, Гарсија освои златен медал на Олимписките игри во Париз 2024, каде беше дел од тимот, но како замена.
Пред официјалната потврда на трансферот, Гарсија објави емотивно видео преку социјалните мрежи во кое се збогува со Еспањол.
„Доаѓа моментот кога патиштата мора да се разделат. Време е да се збогувам со клубот кој ми беше дом од мојата 15-та година. Секојдневно се трудев да напредувам како фудбалер и како човек, со понизност и гордост што ја бранев мрежата на Еспањол. Знам дека оваа одлука нема да биде лесна за прифаќање, но беше внимателно обмислена. Ви благодарам од срце на сите тренери, соиграчи и луѓе од клубот, а најмногу на навивачите. Секогаш ќе бидам горд што ги носев овие бои. Сега започнува нов предизвик.“
Весникот „Мундо Депортиво“ забележа дека Гарсија, паралелно со објавата, ги ажурирал профилните податоци на Инстаграм и ја избришал фотографијата на која го бакнува грбот на Еспањол.
