Напаѓачот на Интер, Мехди Тареми, ќе остане во Иран и ќе го пропушти настапот на тимот на Светското клупско првенство. Според „Газета дело Спорт“, иранскиот голгетер нема можност да патува за САД, поради што веќе нема ни да се обидува.
Тареми имаше несреќа да се наоѓа во својата татковина токму кога започна новата ескалација на тензиите меѓу Израел и Иран, изразена преку бомбардирања. Тој токму се подготвувал да патува за Америка, но аеродромите биле затворени. Дополнително, патувањето по копнен пат се смета за премногу ризично, па затоа Тареми останува на безбедно место – најверојатно во засолниште од бомби.
Така пропадна шансата тој да биде дел од тимот на Кристијан Киву, кој се вклучува во турнирот ноќта меѓу вторник и среда, кога Интер ќе се соочи со Монтереј од Мексико.
„Скај Италија“ дури прогнозира дека постои можност Тареми воопшто повеќе да не заигра за Интер и да го промени клубот веќе летово.
