Џек Грилиш го постигна првиот гол за Манчестер Сити при победата од 2-0 против Лестер во Премиер – лигата. За англискиот фудбалер ова беше прв погодок од 16 декември 2023 година. Сепак, денот (2 април 2025 година) беше исклучително емотивен за Грилиш и неговото семејство.
„Мојот мал брат почина на денешен ден пред точно 25 години“, изјави тој за „Скај Спортс“, посветувајќи го погодокот.
Тогаш, на само 9 месеци, Килан Грилиш починал од таканаречениот синдром на ненадејна детска смрт, необјаснета и неочекувана смрт на здраво бебе помладо од една година, најчесто за време на спиење.
„Ова беше тежок ден за нашето семејство. Мајка ми и татко ми беа тука на трибините, па затоа е одлично што успеав да постигнам гол“, додаде 29-годишниот Грилиш.
Семејството, сепак, има уште една голема болка, бидејќи сестрата на Џек – Холи (21), боледува од церебрална парализа.
