ТСЦ Бачка Топола и Јагиелонија одиграа возбудлив прв плеј-оф натпревар од Конференциската лига, а македонскиот репрезентативец Дарко Чурлинов беше во почетниот состав на гостите од Полска, кои славеа со 1-3.
Српскиот тим прв поведе со голот на Ембунгу во 28. минута, но Јагиелонија брзо израмни преку Шпанецот Хесус Имаз само три минути подоцна.
Во второто полувреме, гостите од Полска беа поагресивни, но долго не успеваа да го материјализираат притисокот. Сепак, во 82. минута Палулу погоди за 1-2, а во самиот финиш Хесус Имаз го постигна својот втор гол на мечот за конечни 1-3. Дарко Чурлинов на теренот мина 70 минути.
Во другите мечеви од Конференциската лига, Викингур од Исланд направи сензација со победа од 2-1 против Панатинаикос. Молде остана со играч помалку и загуби дома од Шамрок Роверс (0-1), додека Целје и АПОЕЛ одиграа ефикасно реми (2-2).
