Реал Мадрид и Атлетико одиграа 1-1 во жестокото градско дерби на „Сантијаго Бернабеу“, резултат што најмногу може да им одговара на ривалите од Барселона, кои утре имаат шанса да ја намалат бодовната разлика.
Натпреварот беше исполнет со жестоки дуели, а клучниот момент во првиот дел се случи во 35. минута. Чуамени го нагази Лино во шеснаесетникот, а иако првично немаше реакција од главниот судија, ВАР собата интервенираше, по што беше досуден пенал за Атлетико.
Хулијан Алварез беше сигурен од белата точка, изведувајќи „паненка“ со која го надмудри Тибо Куртоа и донесе предност.
Реал одговори силно на стартот од второто полувреме и само пет минути по паузата, Килијан Мбапе погоди за израмнување (1-1). До крајот, „кралевите“ агресивно го бркаа победничкиот гол, додека Атлетико се закануваше преку контранапади, но конечниот исход остана нерешен.
