Атлетико Мадрид е во полна готовност за големото градско дерби против Реал Мадрид кое се игра вечерва на „Сантијаго Бернабеу“, изјави тренерот Диего Симеоне. Реал води на табелата со 49 бодови, еден повеќе од Атлетико, кој има три бода предност пред Барселона по 22 одиграни натпревари.
Атлетико во вторникот го демолираше Хетафе со 5-0 во Купот на Кралот, но Симеоне вели дека тимот сега е фокусиран на дербито.
„Се соочуваме со противник кој има фантастични индивидуалци, што ги прави исклучително опасни“, изјави Симеоне.
Аргентинецот потенцира дека неговиот тим ќе се обиде да го наметне својот стил на игра.
„Знаеме дека Реал ќе започне силно и решително. Тие се многу добри со и без топка, но ќе се обидеме да ја пренесеме играта таму каде што сметаме дека можеме да ги повредиме“, вели тренерот на Атлетико Мадрид.
Последните мадридски дербија беа многу неизвесни – четири меча завршија со 1-1, а секој тим има по две победи во последните четири години. Интересно е што Реал не успеал да слави во последните четири средби против Атлетико.
