Рубен Аморим беше разочаран поради слабото издание на Манчестер Јунајтед и покрај победата од 2-1 против Лестер во ФА Купот. Со доцниот гол на Хари Мегваер, „црвените ѓаволи“ обезбедија место во осминафиналето, но нивната игра повторно не ги задоволи навивачите на „Олд Трафорд“, каде што се слушаа свирежи.
„Ова нема никаква врска со ‘Ферги тајм’. Требаше да играме многу подобро, и со топката и без неа. На почетокот ни недостигаше енергија. Во второто полувреме бевме побрзи и почнавме да добиваме повеќе дуели. Успеавме да направиме пресврт, но не одигравме добро“, призна Аморим.
Манчестер Јунајтед продолжува во ФА Купот, но проблемите остануваат.
„Тренерот е првиот што носи одговорност кога тимот не се претставува на потребното ниво. Целта ни е да учиме, да се развиваме и да станеме подобри“, додаде португалскиот стратег.
Иако Манчестер Јунајтед е актуелен освојувач на ФА Купот и победи на четири од последните пет натпревари во сите конкуренции, тимот продолжува да разочарува во Премиер – лигата, каде што моментално се наоѓа на 13. место.
