Карло Анчелоти e еден од најтрофејните тренери во историјата, со Реал Мадрид освои 15 трофеи. Најзначајни меѓу нив се двата шампионски наслови во Ла Лига, двата Купа на Кралот и неговата круна на успехот – три титули во Лигата на шампионите. Под водство на Анчелоти, Реал е актуелен шампион на Шпанија и на Европа.
Сепак, оваа сезона статусот на Анчелоти во Реал не е недопирлив. Причината е серијата порази во важни натпревари: против Лил, Милан, Ливерпул и Атлетик Билбао, додека градското дерби против Атлетико Мадрид заврши само со реми.
Она што најмногу му се забележува од страна на раководството и навивачите е дека ги загуби двата дуели со Барселона, во првенството и Суперкупот, со вкупна гол разлика 2:9.
Вториот пораз од Барселона се случи пред пет дена, во финалето на шпанскиот Суперкуп (2-5).
Реал својот прв натпревар по тој дебакл го одигра на „Сантијаго Бернабеу“ против Селта, во осминафиналето на Купот. Шпанските медиуми најавуваа дека неуспех во тој меч би значел и отказ за Анчелоти.
Иако Реал се спаси по продолженија (5-2), тимот го загуби водството од два гола во финишот на регуларниот дел.
Анчелоти избегна отказ, но не успеа да ги избегне свирежите од навивачите на Реал. Видео-снимката од претставувањето на тимот на „Сантијаго Бернабеу“ покажува како, по читањето на неговото име од страна на спикерот, следуваат оглушувачки свирежи.
