Фудбалерот на Милан, Рафаел Леао, одговори на новите критики кои му ги упати поранешниот репрезентативец на Италија, Антонио Касано.
По финалето на Суперкупот на Италија, во кое Милан го победи Интер со пресврт, Касано изјави дека Леао не е доволно добар за да игра за седумкратниот шампион на Европа.
„Леао не знае како да игра тимски и Консеисао брзо ќе разбере дека е нула од играч и фолирант“, изјави Касано гостувајќи во една ТикТок емисија.
Португалецот, кој влезе во игра против Интер во 50. минута и асистираше за победничкиот гол на Тами Абрахам, ја коментираше изјавата на Касано на својот „X“ профил, нарекувајќи го „кловн“.
Новиот тренер на Милан, Серџо Консеисао, го пофали Леао по освојувањето на Суперкупот, но исто така напомена дека има уште многу сегменти на кои треба да работи неговото крило.
„Леао е феномен, а ако направи уште неколку промени, ќе биде еден од најдобрите играчи на светот до крајот на сезоната“, изјави Консеисао.
