Селекторот на фудбалската репрезентација на Казахстан, Станислав Черчесов, ќе остане на својата позиција, потврдија од Казахстанската фудбалска федерација. Оваа информација следува откако голем дел од казахстанските медиуми објавија дека Черчесов ќе биде отпуштен, но таа вест беше демантирана од страна на федерацијата.
„Информацијата која беше објавена во некои медиуми за оставката на селекторот на националниот тим, Станислав Черчесов, не е точна. Во моментов, Черчесов продолжува да работи како предводник на репрезентацијата и има валиден договор со Казахстанската фудбалска федерација“, се наведува во соопштението од КФФ.
Черчесов ја презеде функцијата во јуни 2024 година, но неговиот мандат досега не донесе позитивни резултати. Под негово водство, Казахстан одигра шест натпревари во Лигата на нациите, при што забележа едно реми и пет порази, без постигнат гол. Репрезентацијата го заврши натпреварувањето на последното место во групата со Норвешка, Австрија и Словенија во Лига Б. Следниот циклус на Лигата на нациите ќе го продолжат во Лига Ц.
Во квалификациите за Светското првенство 2026 година, Казахстан ќе се натпреварува во група со Белгија, Велс, Македонија и Лихтенштајн, што ќе биде голем предизвик за тимот.
