Лука Станковски во тимот на колото во Србија

Поранешниот младински репрезентативец Лука Станковски ја оживеа својата кариера со одличните настапи за Раднички Крагуевац.

По периодот во турскиот Газијантеп, каде што не доби вистинска можност и беше испраќан на позајмици, Лука Станковски пронајде нова фудбалска приказна во Србија. Во Крагуевац, тој целосно го искористи дадениот простор и есенва стана клучен играч на тимот кој е едно од најпријатните изненадувања во српската Суперлига, моментално пласиран на петтото место на табелата.

Минатиот викенд, Станковски и Раднички забележаа значајна победа против Спартак на домашен терен. Станковски блесна со својата игра – еднаш ја погоди гредата, а му беше поништен и гол. Неговата одлична форма не остана незабележана, па со право е вклучен во тимот на колото во Суперлигата на Србија.