Менаџерот на Ливерпул, Арне Слот, изјави дека нема намера да експериментира со составот за натпреварот против Џирона и ќе се потпре на најдобрите играчи. Ова го потврди холандскиот стратег на прес-конференцијата пред дуелот во Лигата на шампионите.
„Дури и да не беше одложено дербито со Евертон, можеби вечерва ќе го изберев истиот состав. Се разбира, никој не може да предвиди што би се случило во таков натпревар“, изјави Слот.
„Сметам дека од аспект на безбедноста за сите, одлуката за одложување на натпреварот беше правилна. Тоа ќе биде последното дерби на „Гудисон Парк“ и треба да се одигра во оптимални услови. Играчите имаа време за одмор, па нема причина за ротации против Џирона. Со сигурност ќе излеземе со многу добар состав“, истакна менаџерот на „црвените“.
„Нашата цел е да завршиме меѓу првите осум на табелата и да го избегнеме плејофот. Џирона е силен тим кој сака да ја контролира топката. Тие имаат многу квалитетни фудбалери, но како Холанѓанец би го истакнал Дејли Блинд“, додаде Слот.
