Килијан Мбапе се соочува со критики заради недостиг на добра форма откако ова лето се пресели во Реал Мадрид. Неговите перформанси кои се далеку од очекуваните станаа тема на дебата, а еден од најконтроверзните коментари дојде од поранешниот француски репрезентативец и светски шампион од 1998 година, Емануел Пети.
Пети, гостувајќи во шоуто на „RMC“, изјави дека Мбапе е под влијание на „црна магија“, за која тој верува дека е организирана од неговиот поранешен соиграч во репрезентацијата, Пол Погба.
„Навистина мислам дека на Мбапе му е направена црна магија. Некои луѓе можеби не веруваат во тоа, но јас верувам. Сите ми велат дека Погба е тој што стои зад тоа“, изјави Пети.
Обвинувањата за „црна магија“ поврзани со Погба не се новост. Пред некое време, неговиот брат Матијас Погба тврдеше дека Пол ангажирал вештерка за да го „урочи“ Мбапе, особено пред Светското првенство во Катар во 2022 година.
Овие тврдења предизвикаа големо внимание и полемики. Ниту Мбапе, ниту Погба официјално не се изјаснија за најновите изјави на Пети. Контроверзиите дополнително го одвлекуваат вниманието од фокусот на играта, а Реал Мадрид и навивачите на клубот очекуваат Мбапе наскоро да ја врати својата врвна форма.
