Фудбалската репрезентација на Македонија вечерва (20.45 часот) ја пречекува Летонија на Националната арена „Тодор Проески“ во Скопје во петтиот меч од тековниот циклус во Лигата на нации. Со серија од три победи без примен гол, селекцијата на Благоја Милевски е фаворит на дуелот со Летонците кои релативно лесно и убедливо ги совлада и во Рига.
Ако можеа во Рига, секако дека можат и во Скопје, со поддршката од македонските фанови.
Голманот Столе Димитриевски би сакал повторно неговата мрежа да мирува, но пред сѐ Македонија да оствари победа.
„Нашата цел е нова победа, да го осигураме првото место во групата, а јас би сакал и да остане мојата мрежа недопрена. Атмосферата во националниот тим е одлична, се надеваме дека ќе ја продолжиме серијата од минатиот мини-циклус. Ја респектираме Летонија, знаеме дека се квалитетна селекција и дека нема да биде лесно, но веруваме во нашиот квалитет и ќе сториме сѐ да стигнеме до нова победа“, изјави Столе Димитриевски.
Македонија овој циклус во Лигата на нации ќе го заврши со мечот против Фарски Острови, на 17 ноември, исто така на Националната арена „Тодор Проески“ во Скопје.
