Милевски: Наша цел е да го задржиме првото место со победи на последните два меча од циклусот

Фудбалската репрезентација на Македонија во ноември ја очекуваат двата последни натпревари од Лигата на нации. На домашен терен нашиот национален тим ќе ги пречека Летонија и Фарски Острови, а селекторот Благоја Милевски денеска го објави и списокот на повикани фудбалери.

На него како дебитанти се Марко Алчевски и Бехар Фета, а повратник е и Сефер Емини.

„Да им посакам добродојде на двајцата дебитанти Алчевски и Фета. Се надевам дека ќе се наметнат со својот потенцијал и во иднина ќе бидат важна алка во националниот тим. За жал дефинитивно нема да игра Тихо Костадинов, а Муслиу и Трапановски се неизвесни поради повреди. Свесни за важноста на овие два меча и наша примарна цел е да завршиме на првото место. Очекувам победа против Летонија, но очекувам многу потежок дуел од тој во Рига. Потоа ќе размислуваме и за вториот меч против Фарски Острови. Летонија е селекција која сака да игра фудбал, бара да го има поседот на топка кај себе. Ние добро одговоривме на средбата во Рига, наша цел е и во Скопје да ја наметнеме нашата игра и да имаме контрола“, изјави селекторот Благоја Милевски.