Македонскиот претставник Шкендија утре во Ерменија го започнува својот пат во квалификациите на Конференциската лига. Ривал на тетовскиот тим е ерменскиот клуб Ноа, а тренерот Јетон Беќири верува дека Шкендија ќе ја преодолжи традицијата на добри игри во Европа и дека ќе извлече позитивен резултат.
„Шкендија неколку пати низ историјата се соочила со ерменски екипи. Имаме апсолутен респект за ерменскиот фудбал и за екипите од оваа земја. Подготвени сме да го дадеме најдоброто од себе, имаме информации за противникот иако составите секако се менуваат секое лето. Шкендија игра по традиција добро во Европа и ние ќе се обидеме да ја продолжиме таа традиција“, изјави тренерот на Шкендија, Јетон Беќири на прес – конференцијата.
Натпреварот меѓу Ноа и Шкендија од првото квалификациско коло во Конференциската лига се игра утре (18 часот) на стадионот „Абовјан“ во Ереван.
