Репрезентацијата на Србија го заврши своето учество на Европското првенство во Германија по првата фаза, завршувајќи на последното, четврто место во групата Ц. Англија ја освои групата, пред Данска и Словенија, кои продолжија во нокаут-фазата, додека Србија освои само два бода од три натпревари. Многумина се прашуваа каква ќе биде судбината на селекторот Драган Пикси Стојковиќ, а тој ја донесе својата одлука.
Неговата одлука е да остане на клупата, што српските медиуми ја опишуваат како шокантна. Објаснувајќи ја својата одлука, тој смета дека со составот што го имаше направил максимум и дека Србија не се посрамила со двата освоени бода и еден постигнат гол во 270 одиграни минути.
Со неговата оценка не се согласува српската јавност, па така некои медиуми пишуваат дека, без оглед на важечкиот договор и парите за отштета, околу еден милион евра, се очекувало тој да биде сменет веднаш по испаѓањето од ЕВРО 2024.
