Две желби за куп-трофејот: Тиквеш и Воска во историско финале

Првпат во финале, и секако дека сакаат да го освојат пехарот во Купот на Македонија. Тиквеш и Воска Спорт имаат иста желба, да испишат историја и да остварат излез во Европа.

“Кога сме веќе во финалето, секако дека сме тука и да го освоиме. Нема да бидеме скромни, сакаме да го освоиме пехарот. Верувам дека моите фудбалери ќе бидат максимално мотивирани и дека ќе ја заокружиме оваа сезона на најдобар можен начин”, изјави Ѓорѓи Мојсов, тренерот на Тиквеш.

Воска Спорт имаше успешна дебитантска сезона во елитата, успеа да обезбеди опстанок, а сега ќе игра и во финалето на Купот.

“Еднаш бев учесник во финале како тренер на Металург и загубивме од Работнички. Се надевам дека сега со Воска Спорт ќе бидеме поуспешни и дека ќе ги оствариме нашите цели”, изјави Срѓан Захариевски.

На прес-конференцијата присуствуваа и капитените на двете екипи, Александар Вареловски и Костадин Захов.

“Тиквеш има голема традиција, а сега првпат ќе играме и во финалето на Купот. Ќе дадеме се од себе, па и повеќе од тоа, за да слави цело Кавадарци”, истакна Вареловски.

Захов има освоено трофеи со Воска, но вели дека ова е нов голем предизвик, да освои прв историски пехар со тимот од Охрид.

“Многу е поинаку, веројатно и многу поголем предизвик. Се надевам дека ќе успееме да стигнеме до пехарот. Блиску сме до пехарот, но треба и да се одигра финалето на најдобар можен начин”, изјави Костадин Захов.