Атлетико Мадрид покажува сериозен интерес да го доведе во своите редови фудбалерот на Арсенал, Олександр Зинченко. Се очекува украинскиот репрезентативец да го напушти Арсенал пред затворањето на трансфер-пазарот следната недела, а „јорганџиите“ веќе започнаа преговори за неговиот трансфер.
„Атлетико Мадрид се вклучи во трката за Олександр Зинченко. Се водат сериозни разговори, а Шпанците се подготвени за постојан договор или позајмица со задолжителен откуп. Арсенал постави цена од 20 милиони евра, плус дополнителни 8 милиони евра во форма на бонуси“, открива „Атлетик“.
28-годишниот лев бек изрази желба да си замине од „Емирати“. Борусија Дортмунд останува во трката, но моментно е помалку активна, бидејќи играчот е премногу скап, а и Борусија бара фудбалер кој може да игра и како централен дефанзивец.
Зинченко пристигна во Арсенал од Манчестер Сити во 2022 година за 35 милиони евра и на почетокот беше важен дел од формацијата на „топџиите“. Сепак, со текот на времето го загуби местото во првиот тим, а оваа сезона има одиграно само 13 натпревари во сите натпреварувања, со вкупно нешто над 400 минути на теренот. Украинецот е репрезентативец на својата земја со 70 настапи и 10 постигнати голови.
