Познатиот црногорски фудбалер и моментно член на стручниот штаб на репрезентацијата на неговата земја, Мирко Вучиниќ, е осуден на две години затвор, условно поради затајување данок, објави „Кориере дело спорт“.
Истиот весник наведува дека поранешниот напаѓач на Лече, Рома и на Јувентус е осуден, бидејќи на италијанските даночни власти не ја пријавил сумата од близу 6 милиони евра, која ја заработил во периодот од 2014 до 2017 година кога настапувал во Обединетите Арапски Емирати, за Ал-Џазира.
„Кориере“ додава дека пресудата, изречена од првостепениот суд во Лече, произлегува од обвинението за лажно пријавување.
Пресудата ја изрече судијката Валерија Феделе, а по наредба на истражниот судија Серџо Тоши веќе започна превентивната конфискација на средства во вредност од даночно затајување – тековни сметки, движен и недвижен имот (вили, станови, мотори). пишува „Кориере“.
Вучиниќ ќе има право на жалба на оваа судска одлука.
Одбраната на Вучиниќ претходно тврдеше дека даночната резиденција на нивниот клиент била во Абу Даби, а не во Италија, каде што тој го поминал најголемиот дел од својата кариера.
Од друга страна, обвинителот Масимилијано Кардучи, кој инаку бараше казна од четири години затвор, нагласи дека Вучиниќ морал да плаќа данок во Италија.
Медиумите од Апенините пред четири години пишуваа дека Вучиниќ морал да плати 1,4 милиони евра во 2014 година, 1,9 милиони во 2015 и 2016 година и уште 542.000 евра данок во 2017 година.
