Лидерот Воска има отворен пат кон историски влез во елитата откако во минатото коло на неверојатен начин, со пресврт во судиското продолжение, го победи Вардар. Но, јасно е дека треба до крајот да се одработи задачата. Денеска тимот на Берат Имери има нов предизвик, гостување кај Кожуф во Гевгелија.
„Атмосферата во клубот е многу добра по таа голема победа против екипата на Вардар која ни даде уште поголема сигурност, но и ни овозможи веќе силно да веруваме во пласман во Првата лига што е и главната цел на челниците на Воска спорт. Вардар веќе му припаѓа на минатото, бидејќи сега гледаме кон следниот натпревар, оној против Кожуф. Мислам дека и за овој натпревар сме добро подготвени и дека со голем оптимизам патуваме во Гевгелија да докажеме дека сме подобри и дека со последовни победи до крај ќе го оствариме сонот. Остануваат уште неколку натпревари, а нашите амбиции како клуб се конечно да бидеме први и да бидеме прогласени за шампиони“, изјави Арлинд Алити, фудбалерот на Воска.
Гостивар го очекува гостување кај Аресими. Со новиот тренер гостиварци тргнаа добро, но ќе треба да се докажат и до крајот на шампионатот.
Вардар игра дома против Слога Виница, ќе треба да се опорави од шокот, но истовремено ќе чека и „кикс“ на водечкиот тандем, Воска и Гостивар.
Пелистер е домаќин на Караорман во Битола, а Детонит Плачовица ќе ја пречека Каменица Саса. Охрид ќе игра против Беса, а Тетекс ќе ја нагости Беласица. Борец во Велес ќе се сретне со Локомотива Пехчево.
