Неверојатни сцени му претходат на мадридското дерби во Купот на Шпанија. Навивачите на Атлетико Мадрид обесија од мост кукла со ликот на фудбалерот на Реал Мадрид, Винисиус Жуниор, и на тој начин испратија мрачна порака до бразилскиот фудбалер. По ваквиот страшен чин реагираше клубот Атлетико Мадрид како и раководството на Ла Лига.
До обесената кукла стоеше натписот „Мадрид го мрази Реал“.
„Ваквите дела се целосно одбивни, неприфатливи и срам за нашето општество. Ривалството меѓу нашиот клуб и Реал Мадрид е на максимум, но и нашата почит е на максимум. Никој, без разлика на нивните ставови или бои, не смее да го загрозува соживотот на нашите два клуба“, објави Атлетико Мадрид.
И шпанското фудбалско првенство ги осуди ваквите сцени.
„Силно ги осудуваме актите на омраза и заплашување на кои беше изложен Винисиус. Како и секогаш кога станува збор за вакви работи, нашата лига ќе спроведе истрага и ќе бара најстрога можна казна за сторителите“, се вели во соопштението од Ла Лига.
Натпреварот помеѓу Реал и Атлетико ќе се одигра в четврток од 21 часот на стадионот „Сантијаго Бернабеу“ во рамките на четврт-финалето на Купот на Шпанија.
