Клубовите од Премиер-лигата одлучија ВАР системот (Видео помошник судија) да биде присутен на нивните натпревари и следната сезона. Единствениот клуб кој гласаше за укинување на ВАР беше Вулверхемптон кој со свој предлог го иницираше гласањето, додека сите останати 19 клуба беа против.
Иако иницијативата на Вулвс беше далеку од потребното двотретинско мнозинство (14 гласа) за укинување на ВАР, се вели дека иницирала здрава дискусија меѓу клубовите, кои на тој начин во официјалното соопштение истакнале дека се договориле ВАР да биде „подобрен и во функција на играта и на навивачите“.
За потсетување, ВАР беше воведен во Премиер – лигата во 2019 година, но сѐ уште е предмет на бројни контроверзии. Аргументите на Вулвс за укинување беа многубројни, а еден од нив беше дека ВАР го промени односот на навивачите кон фудбалот поради задоцнетите прослави на голови.
Дополнително, видео проверките ја забавија играта, па често се трошеше многу време за проверка и цртање линии. Сето тоа предизвикува фрустрации кај навивачите и затоа беше предложено да се укине ВАР.
Исто така, ВАР не ги елиминираше судиските грешки бидејќи лоши одлуки се носат и по прегледување на видеата.
