Вардар и Силекс вчера играа натпревар од четвртфиналето на Купот на Македонија на Арената Тодор Проески, а таа набрзо повторно ќе биде затворена за натпревари.
Во сабота Вардар ќе ја пречека Беса на најголемиот стадион, а потоа Националната арена „Тодор Проески“ од недела ќе биде недостапна за домашните екипи поради реконструкција на тревнатата подлога. Работите се прават со цел стадионот да биде во оптимална состојба за квалификацискиот меч на Македонија против Велс на 25 март.
Ова значи дека Вардар и Работнички, кои своите натпревари ги играат на Градски, ќе мора да бараат алтернативни стадиони за своите домашни средби.
Загрижува фактот дека и покрај новиот тревнат терен кој беше поставен на Арената, продолжува праксата тој да биде затворен еден месец пред секој натпревар на националниот тим.
