Трајковски со прекрасен гол донесе водство за Македонија во Астана (ВИДЕО)

Фудбалската репрезентација на Македонија со водство од 0-1 замина на одмор против Казахстан, на тешкото гостување во Астана, во квалификациите за Светското првенство 2026. Иако натпреварот започна изедначено, „црвено-жолтите“ беа тие што ја искористија шансата и дојдоа до водство преку искусниот Александар Трајковски.

И покрај тоа што селекторот Благоја Милевски беше отсутен поради суспензија, тимот изгледаше подготвено и фокусирано. Во почетниот состав се најдоа три нови имиња во однос на мечот со Белгија – Деспотовски дебитираше во одбраната, а Чурлинов и Трајковски добија шанса во нападот.

И двете селекции започнаа агресивно и со желба за доминација. Македонија прва се закани преку Елмас и Чурлинов, но голманот Сеисен успешно интервенираше. Казахстан возврати во 15. минута – Кенжебек биеше откосо, но ја погоди стативата.

Темпото потоа малку опадна, со бројни прекини и борба на средина, но возбудувањата се вратија околу 30. минута.Шамородов имаше идеална шанса за домаќините, но Столе Димитриевски реагираше сигурно. Само неколку минути подоцна, во 33. минута, следуваше казна – Трајковски маестрално биеше со волеј-удар и ја затресе мрежата на Казахстан.

Во 38. минута домаќините побараа пенал по еден дуел во шеснаесетникот, но по прегледот на ВАР-снимката, судијата не покажа на белата точка.

Македонија до крајот на првото полувреме го контролираше натпреварот и не дозволи сериозна опасност пред својот гол, носејќи го минималното водство на пауза – сосема заслужено.