Тотенхем ќе ја одбие и втората понуда од Баерн Минхен за напаѓачот Хари Кејн, пренесуваат медиумите на Островот. Се очекува фудбалерот да се приклучи на остатокот од тимот на лондончани за почетокот на претсезонските тренинзи в среда. Втората понуда на Баварците за Кејн беше вредна 80 милиони евра, плус бонуси.
Договорот на англискиот репрезентативец со Тотенхем е до јуни 2024 година. Првата понуда беше во рамките на 70 милиони евра плус бонуси, а беше одбиена на крајот на јуни.
Тотенхем бара најмалку 100 милиони евра за да го продаде својот капитен.
Шампионот на Бундес-лигата е во потрага по нов напаѓач откако минатата сезона имаше одредени проблеми на таа позиција. Германскиот весник „Спорт Билд“ минатата недела објави дека тренерот на Баерн Минхен, Томас Тухел, го посетил Хари Кејн во Лондон во мај во обид да го убеди да им се приклучи на Баварците на лето.
