Бразилскиот гигант Флуминенсе синоќа успеа да го обезбеди опстанокот во Серија А, победувајќи го Палмеирас на гости со 1-0 во последното коло од шампионатот. Со оваа победа, тимот заврши над зоната за испаѓање, со четири бодови предност пред тимовите што испаднаа.
По завршувањето на натпреварот, легендарниот стопер Тијаго Силва приреди необичен и емотивен момент на теренот на стадионот „Алиjанц Парк“ во Сао Паoло.
Силва, кој ја завршува својата славна кариера во Флуминенсе, на колена го помина целиот терен, а на крајот ја допре тревата со глава, препуштајќи се на емоциите.
Оваа сцена ги збуни многумина, но подоцна беше објаснето дека тоа го направил за да го исполни ветувањето дадено на навивачите – дека ќе го направи токму тоа доколку тимот обезбеди опстанок.
Навивачите на Флуминенсе му оддадоа огромна почит на Силва со стоечки овации, покажувајќи колку тој е ценет во клубот. За Силва, кој постигна глобален успех играјќи за ПСЖ и за Челси, оваа борба за опстанок била особено тешка емоционално, имајќи предвид историјата и големината на Флуминенсе.
Сè уште не е потврдено дали оваа сезона ќе биде последна за 39-годишниот Силва. Неговата посветеност и емоционална врска со клубот, сепак, остануваат инспирација за многу луѓе.
