Тренерот на Јувентус, Тијаго Мота, беше бесен и разочаран по елиминацијата на неговиот тим од Купот на Италија, откако Емполи ги совлада по пенал-серија. Натпреварот заврши 1-1 во регуларниот дел, но Јувентус не успеа да ја искористи шансата да оди понатаму.
„Засрамен сум. Навистина ми е срам од нашата игра во првото полувреме и се надевам дека играчите чувствуваат исто. Не смееме да влегуваме во натпревари со ваков менталитет. Ова што се случи беше загрижувачко, а вината е моја. Очигледно не успеав да им пренесам на играчите колку е важен овој натпревар. Не сме во полуфиналето затоа што не заслуживме“, изјави Мота.
Тој не го криеше своето незадоволство од начинот на кој неговите играчи пристапиле кон натпреварот, особено од нивната пасивност.
„Се надевам дека критиките ќе бидат сериозни. Дури мислам дека навивачите беа премногу благи кон тимот по она што го покажавме во првото полувреме. Очекувам веднаш да реагираат, затоа што сега се чувствувам засрамен од тоа што го видов. Секако, ја преземам и својата одговорност, бидејќи не успеав да ги научам што значи да се носи дресот на Јувентус“, продолжи стратегот на „бјанконерите“.
Најмногу го разочарала неподготвеноста на играчите да преземат одговорност.
„Игравме против Емполи, и тоа против нивниот резервен состав. Кога зборуваме за менталитет, тоа значи да знаеш каде се наоѓаш и што треба да направиш. Мораш секој ден да заслужиш да бидеш тука, а не да очекуваш дека работите ќе се случат сами од себе. Барем 20 пати ја вративме топката кон голманот, никој не преземаше одговорност, никој не одеше напред, сите очекуваа некој друг да ја заврши работата. Ова е недозволиво. Единствено што можам да направам е да им се извинам на навивачите, затоа што со оваа елиминација го допревме дното“, заклучи Мота.
Јувентус сега ќе мора брзо да се рехабилитира и да се фокусира на остатокот од сезоната, но оваа елиминација сигурно ќе остави трага врз тимот и неговите амбиции.
