Њукасл има нови богати сопственици кои мислеа дека многу лесно со вбризгување на силна финансиска инвестиција ќе го реновираат клубот со неколку ѕвезди. Му дадоа отказ на Стив Брус и мислеа дека релативно брзо ќе успеат да ја доведат неговата замена. Сепак, работите не одат според планот.
Откако ги „откачија“ Брендан Роџерс и Стивен Џерард, најновото име кое се заблагодати на понудата е Ерик Тен Хаг, тренерот на Ајакс. Раководството на Њукасл му понуди годишна плата од 13 милиони евра, но тој повеќе би сакал да остане на кормилото на Ајакс.
„Кога го продолжив договорот со Ајакс, реков дека имаме тим кој може да се развива. Сакаме да ги „нервираме” најдобрите тимови во Европа. На добар пат сме, може така да се каже”, изјави Холанѓанецот и додаде дека максимално е фокусиран на Ајакс.
„Треба да продолжиме со исто темпо. Ништо не се освојува во октомври, ноември и во декември. Треба да играме вака и во мај“, дополни Тен Хаг.
Ајакс засега игра одлично. Тие се први во домашното првенство. За викендот го победија ПСВ со убедливи 5-0, додека во Лигата на шампионите по три кола имаат максимален ефект и веќе со една нога се во нокаут фазата.
