Судот во аргентинскиот град Сан Исидро одобри пренесување на посмртните останки на легендата на фудбалот, Диего Марадона, во новиот мавзолеј кој се гради во центарот на Буенос Аирес, објавува весникот „Кларин“. Барањето за пренесување на телото беше поднесено од неговите ќерки, Далма и Џанина.
„Бидејќи предавањето на телото се бара од хуманитарни и емотивни причини и има за цел да овозможи на неговите блиски, како и на сите кои сакаат да дојдат, да изразат сочувство или почит кон Марадона, сметам дека доколку пренесувањето на посмртните останки не го загрозува нивното зачувување, нема основа за одбивање на барањето“, се вели во судската одлука.
Во моментов, посмртните останки на Марадона се наоѓаат на приватни гробишта во предградие на Буенос Аирес, кое е затворено за јавноста. Според плановите на неговите ќерки, новиот мавзолеј, кој треба да биде завршен следната година, ќе биде отворен за сите кои сакаат да оддадат почит на аргентинската фудбалска легенда.
Диего Марадона почина на 25 ноември 2020 година на 61-годишна возраст. Причината за смртта беше акутна срцева слабост која довела до белодробен едем. Тој беше светски шампион со Аргентина во 1986 година и се смета за еден од најдобрите фудбалери на 20-от век.
Во текот на својата кариера, Марадона играше за аргентинските клубови Аргентинос Јуниорс, Бока Јуниорс и Њуелс Олд Бојс, за шпанските Барселона и Севилја, како и за италијанскиот Наполи.
Со Наполи ја освои титулата шампион на Италија, Купот на Италија и Купот на УЕФА. Вкупно постигна 363 голови на 687 натпревари, вклучувајќи 50 голови на 113 натпревари за аргентинската репрезентација.
