МАКФУДБАЛ во Ереван,
Македонија помина одлично во Рига, победивме, а и Столе Димитриевски ја сочува својата мрежа. Голманот на Валенсија и еден од нашите најголеми адути во националниот тим, верува дека и на утрешниот меч во Ереван нема да се тресе неговата мрежа.
„Со Шишковски често разговаравме изминатите денови за ерменските репрезентативци, кој каде и како шутира. Тоа го правиме често и имаме информации за нашиот утрешен противник. Но, најважно е што имаме добра комуникација во одбраната на изминатите неколку натпревари. Верувам дека и на утрешниот меч ќе ја сочувам мрежата, тоа е мојата задача, заедно и со помошта од соиграчите. Подготвени сме, ова е еден вид бараж меч, па нека биде како што беше во Грузија кога се пласиравме на Европското првенство“, изјави Столе Димитриевски.
Судиите на утрешниот натпревар во Ереван доаѓаат од Англија. Главен судија ќе биде Стуарт Атвел од Англија.
