Интер официјално го објави новиот договор на тренерот Симоне Инзаги. Стратегот ја продолжи соработката со клубот за уште една година до летото 2026 година.
Според информациите, тој ќе зема плата од 6,5 милиони евра по сезона, а во случај на титула во Серија А, ќе добие бонус од уште 2 милиони евра.
48-годишниот Инзаги пристигна во Интер летото 2021 година, кога го напушти својот претходен клуб Лацио. Досега тој ги водел „нероаѕурите“ на 158 натпревари, со просек од 2,15 бода по натпревар.
Како тренер на миланскиот гигант, поранешниот напаѓач има вкупно шест трофеи: една титула во Серија А од минатата сезона, како и два Купа на Италија и три Суперкупа на Италија.
На неговите постигнувања може да се додаде и финалето на Лигата на шампионите против Манчестер Сити пред една година, кое Интер го загуби со 0-1.
