Силекс, Шкендија и Работнички ќе презимат на врвот на табелата во Првата лига. Трите екипи имаат по 37 бода и се разликуваат само во гол-разликата, и тоа незначително.
Шкендија одигра 0-0 против Гостивар на дербито во Тетово.
Силекс го совлада Вардар со 1-0 во Кратово. Кристијан Ефтимов во 28.минута го постигна единствениот гол за триумф на кратовци. Се чини дека сакаше да нафрли, но на крајот топката заврши зад грбот на Гачевски.
На овој натпревар имаше и две исклучувања, за Донов од Силекс и за Ѓуриќ од Вардар.
Работнички на Националната арена „Тодор Проески“ славеше против Пелистер со 3-0. Двоен стрелец беше Атдхе Мазари, а гол постигна и Али Регба, кој имаше и асистенција за третиот погодок.
Шампионот Струга Трим Лум оствари очекуван триумф (2-1) против Воска Спорт. Стрелец на првиот погодок беше Христијан Малески во шестата минута од дуелот, а во финишот имаше уште по еден гол на двете страни. Осеи погоди за Воска, а во 86.минута уште еден гол за победа на Струга ТЛ од Малески.
Тиквеш ја пречека Брера во Кавадарци и победи со 2-0. Давид Манасиевски беше стрелец на водечкиот гол за домаќините во 45.минута, а Кристијан Стојкоски го потврди триумфот.
Беса загуби со 0-1 на дуелот против Шкупи. Голманот Захов во 57.минута несреќно ја погоди својата мрежа.
