Фудбалерите на Саутемптон доживеаја тежок пораз на домашен терен од Брентфорд со резултат 0-5, но по натпреварот, само една навивачка на „светците“ имаше причина за славење.
Имено, по секој домашен натпревар, Саутемптон организира награда за еден од навивачите кој ќе го погоди точниот резултат на натпреварот. По поразот од Брентфорд, изгледаше дека нема да има доделување награда, бидејќи ретко кој би очекувал резултат 0-5. Но, се случи спротивното.
Клер Шектер, мајката на Хуго Шектер, кој беше вработен во Саутемптон меѓу 2014 и 2018 година, го прогнозирала овој дебакл на својот сакан тим и со гордост пристигна на доделувањето на наградата.
Незавидната задача да ѝ го врачи дресот му припадна на напаѓачот на Саутемптон, Адам Армстронг, на чиј израз на лицето се гледаше длабоко разочарување.
Клер весело мавташе со рацете додека во позадина се слушаа саркастични свирежи и јасно негодување од страна на навивачите на Саутемптон.
