Шимон Марчинијак ќе го суди финалето од Лигата на шампионите меѓу Манчестер Сити и Интер в сабота. Со тоа тој ќе стане само вториот фудбалски судија во светот кој во иста сезона го судел финалето на Светското првенство и финалето на Лигата на шампионите.
Хауард Веб беше единствениот пред него што го направил тоа.
Големата вест е дека врвниот полски судија би можел да добие нова работа, а со тоа и богатство.
Според полските медиуми, Марчинијак добил понуда да суди во првенството на Саудиска Арабија, но и таму да ја организира судиската организација.
По Кристијано Роналдо, кој веќе се вдоми таму и заработува 200 милиони евра по сезона, шеиците тргнаа по најголемите фудбалски ѕвезди, а сега го проширија интересот за да го засилат својот фудбал.
Карим Бензема доби и прифати понуда од Ал-Итихад, а ќе му се приклучи и Н’Голо Канте.
На Лионел Меси му беа понудени 1,2 милијарди евра за тригодишен договор, но тој го одбил богатството на Ал-Хилал и кариерата ќе ја продолжи во МЛС лигата, во тимот на Интер Мајами.
По фудбалските ѕвезди, милионските понуди сега се движат и кон судиската организација. Полскиот судија е прва цел и сѐ уште не се знае дали ја прифатил понудата.
