Напаѓачот на Ливерпул, Мохамед Салах, конечно ги продолжи тренинзите со тимот на „црвените“. Египетскиот интернационалец долго време лечеше повреда на мускулот, но се чини дека проблемите се веќе зад него.
Салах денеска учествуваше на тренингот на Ливерпул, кој беше делумно отворен за медиумите. По тренингот, Јирген Клоп и фудбалерите заминаа за Прага, каде утре ќе се сретнат со Спарта Прага во првиот осминафинален натпревар од Лигата на Европа.
Се очекува Салах да има минутажа во главниот град на Чешка и да биде подготвен за големото дерби в недела против Манчестер Сити.
Другата добра вест за Јирген Клоп е што голманот Келехер исто така беше во тренажен процес. Во последните денови се појавија информации дека Ирецот е повреден.
Како што е познато, стартниот голман на „црвените“, Алисон Бекер, ќе биде подолг период надвор од терените поради проблем со мускулот.
