Роналдо пред портите на Неапол, но поради Елиф Елмас нема да може да биде CR7

Португалската мегаѕвезда Кристијано Роналдо би можел да пристигне во Наполи во финишот на летниот преоден рок. За него би било предизвик да игра во клубот каде настапувал Диего Армандо Марадона. Зделката е огромна и претпоставува Манчестер Јунајтед да го купи напаѓачот Виктор Осимен од Наполи за 100 милиони евра, а Роналдо да дојде на едногодишна позајмица, но комплетната плата да му ја исплаќа англискиот клуб.

Сепак, и доколку тоа се оствари „седумката“ на Наполи ќе му припаѓа на Елиф Елмас. Кристијано Роналдо во Наполи нема да може да го продолжи својот бренд „CR7“. Во Серија А не е дозволено менување на броеви доколку еднаш фудбалерот го задолжил од почетокот на сезоната. А тоа е голем проблем, затоа што Кристијано Роналдо е многу повеќе од фудбалер, неговиот бренд за една сезона „тежи“ многу милиони евра.

Македонскиот репрезентативец Елиф Елмас исто така е цел на Манчестер Јунајтед, но раководството на Наполи категорично ја одби можноста за негова продажба ова лето на „Олд Трафорд“.