Килијан Мбапе веќе подолго време се споменува како голема желба на Реал Мадрид и следен клуб во неговата кариера. Сепак, и покрај некои обиди да го доведе, Реал досега не успеа во таа мисија, па е подготвен да направи потег за да го заштити својот углед во фудбалскиот свет.
Во Мадрид не се откажаа да го доведат играчот кој постигна 227 погодоци и асистираше за 99 гола на 275 натпревари за Пари Сен Жермен, но бараат од него да го направи првиот потег и јасно да стави до знаење дека сака да ја продолжи својата кариера на „Сантијаго Бернабеу“.
Мбапе е под договор до крајот на сезоната, но веќе беше во слична ситуација и претходно, а кога се очекуваше да направи трансфер во Реал Мадрид, реши да ја прифати богатата понуда на ПСЖ да остане во клубот. Во Мадрид се почувствуваа измамени, а шпанските медиуми пишуваат дека го нарушиле имиџот на клубот со приказните за Мбапе, а потоа и неуспешниот трансфер.
Затоа Реал Мадрид сега глуми незаинтересираност, но вистината е дека не се откажале од потенцијалниот трансфер. Сепак, прво Французинот „ќе мора да го одработи својот дел“ и да потенцира дека има јасна намера за трансфер во „кралскиот клуб“.
